xoves, 2 de novembro de 2017

MENÚ DO SAMAÍN

Este curso como estamos traballando o tema da alimentación, elaboramos entre todos un menú arrepiante para o Samaín, con varios entrantes, primeiros pratos, segundos pratos e sobremesas. Ata ten varias suxestións do chef! Todos eles moi apetitosos e nutritivos como podedes ver: fideos con mocos de araña, filloas de sangue de curuxa recheas con tripas de ra, cabazas podres sobre lagartos destripados... 
Con el decoramos o panel que está no corredor da entrada.   




Bo proveito a todos e  todas!

martes, 31 de outubro de 2017

XA CHEGOU O SAMAÍN

Xa está aquí o Samaín, por iso o Bibliocastelo énchese de fantasmas, arañas, zombis, morcegos, esqueletes...



Hai un expositor con libros arrepiantes para que morrades co medo!!!

 

Co gallo do tema do proxecto deste curso, as cabazas convertéronse en apetitosos alimentos: mazás, amorodos, hamburguesas, peixes, grelladas, potaxes, mesmo ata unha batea con mexillóns da Ría. Ollade, quedaron chulísimas!!!



















Moitísimas grazas ás familias pola súa colaboración. Esta actividade non sería posible sen a vosa axuda. Papás, mamás, avós, avoas, tíos, tías, curmáns, curmás, irmáns, irmás, amigos, amigas...sodes uns verdadeiros artistas!!!

Se queredes máis información premede na seguinte imaxe.

domingo, 29 de outubro de 2017

VISITA DO CHEF GONZALO VILLANUEVA

O alumnado de 3º, 4º, 5º e 6º este ano festexaron o aniversario da nosa mascota dun xeito moi especial. Papirus tíñanos preparada unha sorpresa! Convidou a súa festa de aniversario, nada máis nin nada menos, que a un chef internacional, Gonzalo Villanueva. Este gran cociñeiro traballa nun famoso restaurante de comida mediterránea chamado Costa del Sol, que está en Hartford, no estado de Connecticut en Estados Unidos (está preto de New York).


E preguntarédesvos...de que o coñece Papirus? Pois resulta que o ano pasado cando estivo de viaxe, lembrádesvos? un día descubriu por casualidade ese restaurante e como a comida estaba boísima, preguntou quen era o chef. Así foi como coñeceu a Gonzalo, que tamén é de Bueu, concretamente da Praia de Beluso. Mira por onde fóronse atopar dous de Bueu a miles de quilómetros de distancia e ademais, Gonzalo tamén coñece o Cole de A Pedra, xa que a súa sobriña Iria estuda aquí, está en 4ºB. Menuda coincidencia! Ela foi a encargada de presentarnos ao seu tío.



Gonzalo contounos a súa aventura, como un rapaz de Bueu chegou a converterse nun chef en EEUU. Dende moi cativo el quería ser cociñeiro e traballar en New York. Con moito tesón e esforzo o seu soño fíxose realidade!


Con tan só 13 anos marchou a estudar cociña á Escola de Restauración e Hostelería Vilamarín en Ourense.


Na fin de semana, cando viña a casa, compaxinaba os estudos co traballo. Axudaba no restaurante que tiñan os seus pais, "O Peixoto" e tamén traballaba na Centoleira.
Rematou os 5 anos de estudos co mellor expediente e como premio un dos seus mestres ofreceulle un traballo nun restaurante en EEUU. Así con 18 anos cruzou o charco e marchou moi lonxe. Dende entón leva 17 anos traballando alí.







Despois da charla, houbo quenda de preguntas. Os rapaces e rapazas prantexáronlle cuestións moi interesantes: cal era o prato do restaurante que máis pedían os clientes? Cantas Estrelas Michelín tiñan? Que persoas famosas foran ao restaurante?...
Ao final ata firmou autógrafos. Xa é toda unha estrela!



Grazas a Gonzalo Papirus entrou en contacto co fascinante mundo culinario e gustoulle tanto que quere que investiguemos e aprendamos moito sobre cociña e alimentación. Para que descubramos cousas interesantes sobre estes temas, preparounos no Bibliocastelo un expositor cunha morea de libros. Por iso o lema do proxecto deste curso é :

"Unha enchente de libros" 

Moitas grazas Gonzalo por compartir con todos nós a túa incrible experiencia e sobre todo por ensinarnos que os soños están para cumprirse. Que se algo queremos, debemos loitar para acadalo. Con traballo e esforzo todo é posible, ata os soños máis inalcanzables. Amosáchenos unha gran lección de vida! 




Tamén moitas grazas a Maricarmen, a irmá de Gonzalo e a nai de Iria, que foi quen fixo posible este encontro.


Chef Gonzalo, foi un pracer telo con nós! 





sábado, 28 de outubro de 2017

ANIVERSARIO DE PAPIRUS. 24 DE OUTUBRO, DÍA DAS BIBLIOTECAS ESCOLARES

Esta semana estivemos de celebración. O pasado martes foi o Día das Bibliotecas Escolares e o aniversario de Papirus e celebrámolo cunha gran festa. Uns días antes, a nosa mascota enviounos unha tarxeta para convidarnos.





Como somos moitos, celebrámolo en dous días, o martes os nenos e nenas de infantil,  1º e 2º e o xoves, os de 3º, 4º, 5º e 6º.
Este ano Papirus estábanos agardando na súa casa, no Bibliocastelo. Contounos que está moi contento de estar de novo con todos nós. 
Entre todos e todas fixemos unha representación do conto de Kaladraka A sopa verde.









Despois cantamos e bailamos a canción de Papirus e desexámoslle feliz aniversario.



Logo viñeron os agasallos: bonitos debuxos, tarxetas, cartas... Papirus estaba encantado!!! Vai decorar a súa casa con todos eles.
Para rematar a festa, en vez de convidarnos a lambetadas como outros anos, convidounos a froita con chocolate, xa que este ano o tema do proxecto é a alimentación sa e saudable. Ollade o vídeo! 



Mamasiña...que rico estaba!!! Foi unha xornada estupenda!